உழைப்பிற்கும் விடாமுயற்சிக்கும் பெருமை தேடித்தந்தவர்களில் ஒருவர் ஜே.ஆர்.டி. டாடா. சிறந்த நிர்வாகி. குறைந்த வயதில் பெரிய பொறுப்புக்களை வகித்தவர். காலம் கருதி பின் வாங்காது திட்டமிட்டுச் செயற்படுபவர் என பல பெருமைகளை உடைய டாட்டாவின் வாழ்க்கை வரலாற்றை நான்கு பகுதிகளாக அறந்தை மணியன் எழுதியுள்ளார். வாழ்க்கை வரலாற்றைப் புள்ளி விபரமாக மட்டும் கூறாமல் நிகழ்வுகளில் சுவை கூட்டி உண்மையிலிருந்து விலகாமல் எழுதியுள்ளார். டாடாவின் முடிவுகளால் ஏற்பட்ட நிறைகுறைகளையும் ஆசிரியர் எழுதியுள்ளார். டாடாவின் துணிச்சல் மிக்க செயல்கள் தேடித்தந்த வெற்றிகளையும் அரசாங்கம் செய்யும் தவறுகளைச் சுயநலமின்றி சுட்டிக்காட்டிய நேர்மையையும் ஆசிரியர் விரிவாக எழுதியுள்ளார். "ஏர் இந்தியா" "ஏர் இந்தியா இண்டர்நேஷனல்" நிறுவனங்கள் உருவாகக்காரணமாகவிருந்த டாடாவின் செயற்பாடுகள் இந்திய பொருளாதாரத்தின் தூண் என்றே சொல்லலாம். 17 கோடி ரூபாய் சொத்தை தனது கடின உழைப்பாலும் விடாமுயற்சியாலும் ஐம்பது ஆண்டுகளில் பத்தாயிரம் கோடியாக உயர்த்தியவர் டாடா. டாடாவின் வாழ்கை தன்னம்பிக்கை ஊட்டும். --- ஜூன் 2005 ---